Aqtóbe oblysynyń ákimi Berdibek Saparbaev osy aýqymdy jobanyń júzege asyrylýymen tanysyp shyqty.
- Sý taratqyshty 2019 jyly mamyr aıynyń basynda iske qosýdy josparlap otyrmyz. Myń gektardan astam jerdi únemi sýaryp otyrsa qalanyń jasyl beldeýi ulǵaıady. Bul ekologııalyq jaǵdaıdy sózsiz jaqsartady, ıaǵnı nátıjesinde aýaǵa, aqtóbelikterdiń densaýlyǵyna oń áserin tıgizedi, - dedi «Qazsýshar» RMK Aqtóbe fılıalynyń dırektory Bekzat Nametov.
Ol sondaı-aq, geolog Petr Kotıktiń BAQ-ta: sý qoımasyndaǵy sý qalany sýarý úshin jaramsyz dep jarııalanǵan pikirin de joqqa shyǵardy.
- О́miriniń kóp bóligin osy salaǵa arnaǵan adam retinde Aqtóbe sý qoımasynda jınalǵan kóktemgi tasqyn sýlar taza ári sýarýǵa jaramdy ekenin jaýaptylyqpen aıtamyn. Oılanyńyz, sý qoımalary jerlerdi, sonyń ishinde ózimiz tamaq ósirip otyrǵan jerlerdi sýmen qamtamasyz etý úshin salyndy emes pe?! Jáne ondaı sýdy aldyn ala tazartýdyń qajeti joq, aýyz sýdy ǵana aldyn ala tazartady. Budan basqa, túrli qyzmetter sý qoımasynan únemi sý synamalaryn alady. Sońǵy synamalardyń nátıjeleri, aldyńǵylar sekildi sýdyń sýarýǵa jaramdy ekenin rastap otyr. Bul jerde sondaı-aq, sý qoımasynan keletin sýdyń tómennen emes, jalpaq bekitpe arqyly beriletinin túsiný kerek. Ol taza, paıdalaný normalaryna saı, - dep atap ótti maman.
Jalpy uzyndyǵy shamamen 15 shaqyrymdyq jobany úsh kezeńde júzege asyrý josparlanǵan. Qazirgi tańda birinshi kezekti júzege asyrý bastaldy. Sonyń aıasynda sý toǵandary, sorǵylaý beketi, sý jibergish qondyrǵy salynyp, qubyr jelileri tóseledi, elektr energııasy júrgiziledi jáne Sazdy ózeniniń jaǵasy men arnasy bekitiledi. Jumysqa 250-den astam adam men 25 birlik tehnıka jumyldyrylǵan.
Sý taratqysh iske qosylǵan soń Sazdy ózeniniń aǵyn sýy bar sý aıdynyna aınalatyny da mańyzdy.
Tabıǵı resýrstar jáne tabıǵatty paıdalanýdy retteý basqarmasynyń basshysy Nurjan Aqqul: « Saǵat saıyn ózenge 500 tekshe sý quıylady. Tunǵan sý bolmaıdy – eshqandaı ıis bolmaıdy. Sý taratqysh jobasyn «Qurylys konsaltıng» Ulttyq ortalyǵy» AQ lısenzııasy bar mekeme ázirlegen, barlyq ekologııalyq, memlekettik saraptamalardan ótken. Budan ózge, ol Eýrazııalyq qaıta qurý jáne damý bankiniń jelisi boıynsha qarjylandyrylady. Sarapshylar bankti de muqııat zerttegen. Eshqandaı teris áseri bolmaıdy. Qala, turǵyndar odan tek paıda kóredi», - degen senimde.
Temir Qusaıyn
